اوکھے معنے
فلک شیر چیمہ ہوراں دے ناں
سوکھے لفظ تے اوکھے معنے، ڈوہنگیاں تیریاں گلاں
جیوں ٹبھی نہیں لاون دیندیاں شوہ دریا دیاں چھلاں
وَحدت والا کِلا پَکا، نہ اُکھڑے نہ بھجے
رسی رب دی سب توں پکی، بندہ اس نال بَجھے
سچے ہادی کڈی سوہنی تے سُچی گل دسی
حدوں اندر اندر رہنا اے، ڈھِلی رکھنی اے رسی
لَم تَکُ شَیئاً، لَم اَکُ شیئاً، انت وی اپنا فان اے
رب نے اپنا نائب کیتا، واہ مولا دی شان اے
اس دے اگے تیری بھُل چُک وڈی گل نہ کوئی
پر، جے تنگھڑ تنگھڑ بہسیں، کتے نہ تیری ڈھوئی
۔۱۷۔اگست ۲۰۱۶ء۔
