غزل: سرِ شام ہے جو بجھا بجھا یہ چراغِ دل

غزل

سرِ شام ہے جو بجھا بجھا یہ چراغِ دل

دمِ صبح پاؤ گے اطلاعِ فراغِ دل

پَرِکاہ موجِ ہوا پہ ہے جو رَواں دَواں

نگہِ پراں کی کمند ڈال، دماغِ دل

شبِ تار بھی، مرا راہبر بھی ہے بے جہت

کوئی لو تو دے ذرا جگمگا مرے داغِ دل

وہ نگاہِ ناز ہے مہرباں، رہے احتیاط

اے وفورِ شوق چھلک نہ جائے ایاغِ دل

رہیں گل بھی، بادِ صبا بھی، ابرِ بہار بھی

جو نہ خار ہوں تو کمال پائے نہ باغِ دل

۔  ۲۶؍ دسمبر ۲۰۰۵ء