پنجابی: قطعات، بولیاں، گیت، وغیرہ
بولیاں
۔۲۔دسمبر ۲۰۱۵ء
ویکھیں منہ چ نہ پے جان چھالے، نی تتا تتا گُڑ کھائیں ناں
مینوں چِیڑھ بنا دے چاچا، چمبیڑنی میں تیرے پت نوں
نی تینوں آکھیا سی لسی لے کے آئیں جے رَوہ دا سواد لینا ای
تیری ماں نے لسی نہیں دتی، وے راتیں ساڈی مَجھ نہیں ملی
۔۱۰۔اگست ۲۰۱۶ء
کاہنوں سجناں نوں اینویں آزمایا، اک نواں روگ لا لیا
تیری خیر ہووے ای، بھل جانیا، شالا ساڈی لوڑ نہ پوی
۔۱۰۔ستمبر ۲۰۱۶ء
ہل واہندیاں ویکھ تے تینوں، میں لیرو لیر ہوئی
بے بے گندلاں دا ساگ پکایا، وے مکھنی میں آپ بن گئی
مینوں چھڈ گئے سجن پیارے، ربا! میں غریب ہو گیا
میری ماں سکھنی مُڑ آئی، میں دنیا نوں کیہ کرنا
مُنڈا مر گیا پھاہیا لے کے، ماں جدوں مُڑی سَکھنی
مَجھ بہہ گئی کھال وچ تیری، نی، ساڈا تے نکال سُکیا
ساتھوں کھال ٹپیا نہیں جانا، وے پَٹھیاں دی پَنڈ چُک کے
سُن چوڑیاں دا چھن چھن کارا، چِڑیاں نوں چُپ لگ گئی
پار پِنڈ چوں پروہنے آونے، نی! مائیں مینوں ساہ چڑھیا
انگ ساک ملاپاں نال سارے، وچھُنیاں دی تھاں کوئی نہ
مُنڈا کمیاں دا ساک نوں آیا، چوہدری دی پگ ڈِگ پئی
جدوں کھڑ کھڑ ہسدا اے بابا، ایہ گبھرو جوان لگدا
تیرے ہتھ رنگلا کھمب آیا، نیل چڑی جِند ہار گئی
۔۱۸۔مئی ۲۰۱۷ء
ہُن ساہ نال ساہ نہیں اُو رَلدا، تے نہیں سی ایہ پِینگ جھُوٹنی
بھٹھہ سجناں نے کچا پٹیا، تے کندھاں کوٹھے ساڈے ڈھہہ گئے
مھاڑے مونہے سیں نہ لہنی اے ماجھی، تَے یار مھاڑا بولے ہندکو
۔۲۱۔مئی ۲۰۱۷ء
اک جھُوٹا لے کے ہف گیوں، ساہ ہن کتوں منگ لے
ساہ ہووے نہ ہلاریاں جوگا، تے مَوت نوں نہ ہاکاں مارئیے
۔۱۵۔اکتوبر ۲۰۱۷ء
چالاں چلیاں چرن وِسراماں، چھنداں سانوں رول چھڈیا
رات ٹپ گئی ہو گئی سرگھی، اکھیاں چ نیند کوئی ناں
یار ٹر گیا مار کے بولی، ہورناں نوں کیہ آکھئے
کدی گولیا نہ دُنیا دا کہنا، اک تیری گل مار گئی
نہیں اکو جیہیاں ہتھ دیاں انگلاں ، ویکھ بیٹھے اسیں بھَن کے
۔۱۴۔نومبر ۲۰۱۷ء
مُنڈا نس گیا مار کے جھاتی جھَکدا اے گل کردا
اجیہا پیار نے پڑھنے پایا، اَکھراں دی سُدھ نہ رہی
ہُن بھر پیا لمے ہوکے، ویکھ لے چوپال اُجڑی
تینوں آکھیا سی پاویں نہ کھلارا، وے پھر نہیں توں سانبھ سکنا
۔۱۵۔دسمبر ۲۰۱۷ء
ہَڈ بھور کے مٹی کر دیندے ۔۔۔ دُکھ ڈھِڈوں جمّیاں دے
۔۱۶۔جولائی ۲۰۱۸ء
یار نس گیا نہر تے بلا کے، رُڑھ پُڑھ جانا چندرا
۔۱۷۔جولائی ۲۰۱۸ء
جیہڑا جانْدا ای نہیں سجناپا ۔۔ اوہنوں دَسّو کیہ آکھئے
۔۲۱۔اکتوبر ۲۰۱۸ء
جَٹ چھابے وِچ ہتھ پیا مارے ، اکھراں نوں چھَڈ چھُڈ کے
۔۴۔ستمبر ۲۰۱۹ء
اَسیں بال پَنے دے بُڈھڑے، گھَٹّے چ جوانی رُل گئی
ماہیا
سڑے ہٹ پنساری دا
دارو جتھے نہیں لبھدا، میں درداں ماری دا
۔۲۵۔جنوری ۲۰۱۷ء
ٹپا
بھل جانا ایڈی وڈی گل نہیں، چاچا
کسے ہور نوں نہ ایہ دَس بہیں، چاچا
اینویں بنے گا تماشا
سارے جگ لئی ہاسا
گل کیتی آ تے ہُن پکا رہیں، چاچا
بھل جانا ایڈی وڈی گل نہیں، چاچا
۔۲۲۔فروری ۲۰۱۸ء
چوبرگہ
جیندیاں دے میل بھائیا، چنگے بھانویں ماڑے
میلا اے حیاتی والا، گِنویں دیہاڑے
چنگا سنگ اوہی جیہڑا کالجا نہ ساڑے
جیندیاں دے میل بھائیا، چنگے بھانویں ماڑے
۔۶۔اگست ۲۰۱۸ء
بارھیں برسیں
بارھیں برسیں کھٹن گیا تے
کھٹ کے لیاندیاں جوکاں
اوے
سجناں نے بہتا لُٹیا
سانوں تھوڑا لُٹیا لوکاں
سجناں نے بہتا لُٹیا
۔۱۲۔مارچ ۲۰۱۸ء
بارھیں برسیں
کھٹ کے لیاندی گاچی
اوے
کڈی سوہنی جوڑی پھبدی
شالا جیون چاچا، چاچی
کڈی سوہنی جوڑی پھبدی
۔۱۹۔مارچ ۲۰۱۸ء
بارھیں برسیں
کھٹ کے لیاندے لوٹے
اوے
انکھاں نے سانوں ماریا
ہوئے کھا کھا لوکی موٹے
انکھاں نے سانوں ماریا
۔۱۹۔مارچ ۲۰۱۸ء
بارھیں برسیں
کھٹ کے لیاندے چھولے
اوے
بیلیاں چ بولدا پھرے
ٹپے، ماہئے تے ڈھولے
بیلیاں چ بولدا پھرے
۔۲۵۔ستمبر ۲۰۱۸ء