غزل
کچھ نہ بولیں یار، پواڑا مچے گا
ہار کسے نہیں مننی گوگا مچے گا
بکل مار کے بیٹھے نوں کیوں چھیڑدے او
بکل کھلی تے پھر ہاسا مچے گا
اسیں جے تیلی جنی گل تے ہسے وی
تیرے دل وچ ڈر دا دیوا مچے گا
بکل والا چور بھجایاں بھجنا نہیں
اینویں چار چوفیرے رولا مچے گا
ویکھ، چواتی نہ لا، آپ وی سڑ جاسیں
بھانبڑ تیرے وسوں بوہتا مچے گا
ساری عمر دا کتیا مٹی ہو جانا
سکی لکڑ چرخہ، ڈاہڈا مچے گا
آسی تیرا کہیا کسے نوں پچنا نہیں
آل دوالے چیک چہاڑا مچے گا
۔۶۔فروری ۲۰۱۷ء
No comments:
Post a Comment