جگراتے
عمر وہانی، نہ دن چڑھیا، نہ مکے جگراتے
خبرے کس نے ساڈے لیکھیں لکھ چھڈے جگراتے
توں کلا نہیں دندِیں پھَسیا، جھاتی مار چوفیرے
سارے پنڈ نوں وڈھی جاندے دھڑکو تے جگراتے
لوکی چڑھے مداریاں دے ہتھ، نچدے ڈانگوں ڈردے
ہڈاں وچوں پیڑ کیہ مکے، نہیں مکدے جگراتے
اچے محلیں پین دھمالاں کھاہدا ہضم نہ ہووے
ساڈی پانڈے آندراں وَڈھ وَڈھ کھاندے پئے جگراتے
لگدا اے جیوں پینڈے پٹے ڈوہنگیاں صدیاں والے
ہجر تیرے وچ اسیں ہنڈائے اوہ لمے جگراتے
تیریاں ٹھنڈیاں ہانواں کنے جگنو مار مکائے
چھڈ اوئے آسیؔ جھورا جھردیاں نہیں ٹلدے جگراتے
۔۱۹۔اکتوبر ۲۰۱۶ء۔
No comments:
Post a Comment