گیت
آ سجنا! دلدارا پیاریا
مینوں لا لَے سینے نال
آ جا دونویں رل کے کھیڈاں
لکن میچی اتھراں نال
جد کا گیوں آرام نہ مینوں
دن تے رات پکاراں تینوں
دل دا حال سناواں کہنوں
دکھ سکھ پھولاں کس دے نال
آ جا دونویں رل کے کھیڈاں
لکن میچی اتھراں نال
مولا اوہ دن کدوں لیاسی
جس دن میرا جانی آسی
آ کے اپنا حال سناسی
تے کجھ سنسی میرا حال
آ جا دونویں رل کے کھیڈاں
لکن میچی اتھراں نال
میں ہر ویلے ہوکے بھردا
غم دے تیر دلے تے جردا
ہور کسے نال گل نہ کردا
رکھے سارے روگ سنبھال
آ جا دونویں رل کے کھیڈاں
لکن میچی اتھراں نال
ربا میرا ماہی آوے
پھٹڑ دل تے پھاہیا لاوے
یا میری جند وی اڈ جاوے
مک شک جاون کل ملال
آ جا دونویں رل کے کھیڈاں
لکن میچی اتھراں نال
دل میرا اک اجڑیا ڈیرہ
جیہڑا ازلاں تو گھر تیرا
اس وچ کوئی دوش نہ میرا
دھائیو ای اپنے ہتھاں نال
آ جا دونویں رل کے کھیڈاں
لکن میچی اتھراں نال
دس میں تینوں کیویں بھلاواں
کڈھ کلیجہ کنج وکھاواں
دل تے ورتی کیویں سناواں
جیواں اوکھے سوکھے حال
آ جا دونویں رل کے کھیڈاں
لکن میچی اتھراں نال
۱۹۷۲ء
No comments:
Post a Comment