چوبرگے
۔1۔
توں تاں عمراں دی گل کردا ایں ایتھے کل دی وی کچھ سار نہیں
کل دی تاں گل دریڈی اے، گھڑی پل دی وی کچھ سار نہیں
کل خبراں اللہ سوہنے نوں، اتے دوجا کوئی کیہ جانے
کن مرنا جینا ہونا کیہ، کسے گل دی وی کچھ سار نہیں
۔۱۹۷۲ء۔
۔2۔
گل کرنی سوکھی ہوندی اے، گل کر کے نبھاونا سہل نہیں
کربل وچ بال کُہا دینا، اتے سیس کٹاوناں سہل نہیں
اک گل کر کے اس گل دے لئی اگ وچ کُد جاوناں سہل نہیں
تن دن وی رکھاں دے پتر کھا کے ڈنگ ٹپاوناں سہل نہیں
۔۱۹۷۲ء۔
No comments:
Post a Comment