بولیاں
(۱)
پھل جھڑ گئے کریڑی نال سُک کے، تے ٹہنیاں تے کنڈے رہ گئے
(۲)
ساڈے وَیریاں نال یارانے، وِیراں وچ وَیر وَڈھواں
(۳)
اسیں ویچ گھراں دے بوہے، گلی چ گواچے پھردے
(۴)
اج سورج لہندیوں چڑھیا تے برفاں چ اگ لگ گئی
(۵)
میرا سہمیا شہر کراچی، سمندراں چوں سپ نکلے
(۶)
موت پنڈ دیاں گلیاں چ نچدی، حویلیاں چ واجے وجدے
(۷)
تیرے پیڑ کلیجے اٹھدی تے ویکھدا میں، کِویں ہسدوں
(۸)
چنی لاہ دے چنار دیے نارے نی اج تیرے وِیر مر گئے
(۹)
بوسنیا چ بُسکن بچڑے تے مانواں دیاں نینداں اڈیاں
(۱۰)
کندھاں چیچنیا دیاں چیکن دھرتی نے دھاڑاں ماریاں
(۱۱)
اک ماراں مارے گجھیاں تے رون وی نہ دیوے چندرا
(۱۲)
جس منگویں عینک لائی اوہ دوجیاں نوں راہ دَسدا
(۱۳)
کیہ دسیے انکھ دے قصے جے سر اتوں پگ ڈگ پئے
(۱۴)
ہن میرے لک نوں آوے اوہ پہلوں میری بانہہ بھن کے
(۱۵)
موت بوہے اگے بھنگڑا پاوے، حویلی چ دھمالاں پیندیاں
(۱۶)
جیہڑے پنڈ نوں نہ جانا ہووے اودھا کاہنوں راہ پچھنا
۔ ۲؍جنوری ۱۹۹۵ء
No comments:
Post a Comment