غزل
ڈُبی بیڑی کھِیناں کس نوں کہندے نیں
لہریں ڈب مریناں کس نوں کہندے نیں
تن پیراہن لیراں کر پھر جانیں گا
من پیراہن سیناں کس نوں کہندے نیں
اپنا پیٹ جہنم بھر توں کیہ جانیں
چکّی وچہ پسیناں کس نوں کہندے نیں
لمبرداری مل گئی ہینے لوکاں نوں
میں کیہ دساں ہیناں کس نوں کہندے نیں
تیرا چہرہ ساتھ نہ دیندا اکھاں دا
آپے ای بجھ لے میناں کس نوں کہندے نیں
میرے اکھر بھوبل وانگوں تپدے نہیں؟
اندر اگ سڑیناں کس نوں کہندے نیں
ہن تے میرا ناں وی میرا نہیں لگدا
اس توں ودھ گویناں کس نوں کہندے نیں
آسیؔ تینوں پیا اڈیکے مَوت طرحاں
لوکی پُچھن، جیناں کس نوں کہندے نیں
۔ ۲۱؍ دسمبر ۱۹۸۵ء
No comments:
Post a Comment