غزل
چار چوفیرے پھل کھڑے نیں
پر خبرے کیوں ہُسّے جہے نیں
پھلاں نالوں کنڈے چنگے
جہڑے پلو پھڑ لیندے نیں
خبرے کیہ گواچ گیا اے
سجن سانوں وِسّر گئے نیں
رب کرے اوہ خیریں ہووے
بھیڑے بھیڑے خواب آوندے نیں
سینے دے وچہ اٹھن بلّے
خبرے کاہدے غم لگے نیں
ایس نکڑمی دنیا اندر
چنگے لوکی کد رہندے نیں
اٹھ اوئے یار تکالاں پیاں
پنچھی وی ہن اڈ چلے نیں
کامے بندے چھیتی چھیتی
تھک تھکا کے سوں جاندے نیں
لگدا اے اج پہلی واری
آسیؔ جی نے شعر کہے نیں
۔ ۲۴؍ نومبر ۱۹۹۵ء
No comments:
Post a Comment