غزل
سوچاں دے تارے ڈگدے نیں
پلکاں اتے ہنج دھرے نیں
دل دھرتی تے چانن ہویا
عمراں پچھوں یار ملے نیں
سجیا پھلیا کیوں بیٹھا ایں
تینوں کاہدے بھونڈ لڑے نیں
سکھیں وسو، موجاں مانو!
ساڈے وی دن لنگھ گئے نیں
پچھلے سال بہار آئی سی
زخماں دے اوہ پھل ہرے نیں
کلی دھرتی کیہ کیہ جالے
کنے سورج اُگ پئے نیں
چل دلا کِتے ہور ای چلئے
ایتھوں دے لوکی ڈاہڈے نیں
جیون گھمن گھیری اندر
چالیہ سال گویچ گئے نیں
ایڈی چھیتی نیندر کتھوں
حالے تے باراں وجّے نیں
چل مسیتے چلئے آسیؔ
ملاں جی بانگاں دیندے نیں
۔ ۲۴؍ نومبر ۱۹۹۵ء
No comments:
Post a Comment