سِر وچ گھٹا
لمی چوڑی اک حویلیاچا سارا اس دا پھاٹک
اک سوالی
پاٹے لیڑے
سِر وچ گھٹا
ٹٹی ہوئی اک بانہہ اتے پٹی بنھّی
پھاٹک دا کُنڈا کھڑکاوے
رَولا پاوے
اگوں بوہا کوئی نہ کھولے
نہ کوئی بولے
اوہ سوالی
ڈھیر نمانا، نموجھانا
کھڑا کھلوتاسوچیں پے گیا
ایہ کیہ بنیا اے!۔
اک دن ایس حویلی اندر
میری ڈاہڈی عزت ہے سی
اج کیہ ہوئیا؟
کوئی میرے بات نہ پچھے
ذات نہ پچھے
نہ کوئی پچھے
کون کوئی توں
کتھوں آیا ایں
کتھے جانا ای
لگدا اے لوکی اوہو نیں
لگدا اے میں میں نہیں رہ گیا
اوس سوالی
اپنے گل وچ لمکی ہوئی
ٹٹی بانہہ تے جھاتی ماری
اوتھے بہہ گیا
ہلن جوگا وی نہیں رہ گیا
۔ ۱۴؍ دسمبر ۲۰۱۳ء
No comments:
Post a Comment