غزل: ۔۔۔۔ اس شہر کی آب و ہوا سے

غزل

پنجہء زغ تیز تر، اس شہر کی آب و ہوا سے

جھڑ گئے چڑیوں کے پر، اس شہر کی آب و ہوا سے

شور مٹی، زہر پانی اور کچھ لُو کے تھپیڑے

جل گئے کتنے شجر، اس شہر کی آب و ہوا سے

توڑ پھینکے پھول بندھن خود پرستی کی ہوا نے

ٹوٹتے جاتے ہیں گھر، اس شہر کی آب و ہوا سے

دن تو اپنا ایسے تیسے بِیت ہی جاتا ہے لیکن

رات کو لگتا ہے ڈر، اس شہر کی آب و ہوا سے

عقل والوں نے غلامی کی نئی دستار پہنی

ہم بچا لے جائیں سر، اس شہر کی آب و ہوا سے

خونِ تازہ بن کے دوڑوں گا بہاروں کی رگوں میں

خاک بھی ہو جائوں گر، اس شہر کی آب و ہوا سے

یہ ثمود و عاد کی بستی ہے، یاں سے چل نکل جا

دوڑ کر آسیؔ گزر، اس شہر کی آب و ہوا سے

۔ ۲۰؍ اکتوبر ۱۹۸۵ء