غزل
اک دن لڑ گئیاں سن اکھاں
اوسے دن دیاں جاگن اکھاں
تعبیراں نے نیند اڈائی
پھر وی سفنے ویکھن اکھاں
خبرے کون تماشا بنیاے
ایس ڈروں نہ کھلن اکھاں
آلے بھولے گھگو گھوڑے
ویکھ ویکھ نہ رجن اکھاں
پنڈا پیر دھروئی جاندے
مڑ مڑ پچھے جھاکن اکھاں
باہر زمانہ ویری ہویا
گھریں وکھاندے سجن اکھاں
دکھاں دی ڈھیری تے بہہ کے
سُچے موتی رولن اکھاں
بڑا دریڈا ویکھدیاں نیں
تیریاں چانن چانن اکھاں
میرا درد ونڈاون آیا ایں؟
پھر کیوں تیریاں ہسن اکھاں
ایہ سُچے شیشے نیں آسیؔ
جھلّیا جھوٹھ نہ بولن اکھاں
۔ ۳۱؍ اگست ۱۹۸۵ء
No comments:
Post a Comment