جھانجے جھیڑے
کوڑی دنیا، کوڑ پسارا، کوڑے جھانجے جھیڑے
کوڑا جیون، سچ مریون، باقی کوڑ بکھیڑے
دل دیا گلاں مولا جانے، جو حلقوموں نیڑے
جگ تے آیا سیں کاہدے لئی پے گیوں کمیں کیہڑے
آون لگیاں کیہ متھیا ہئی تیں نال خالق تیرے
عشق چواتی جتھے لگے سب کچھ ساڑ نبیڑے
سکھ نہ وسیا اوہ گھر جتھے، عشق نے لائے ڈیرے
عاشق رلدے رہے سدا تھیں، رہے انوکھے جھیڑے
لے وے کاگا چوری کھا لے، جان صدقڑے تیرے
یار دے نانویں سنیہا لے جا، مولا توڑ اپیڑے
پرت جواب نہ آیا کوئی گھلے لکھ سنیہڑے
رونق رہی نہ تیں بن کائی، پا پھیرا ساں ویہڑے
ہو نہ آس امیدوں وانجھا، ہو کجھ ہور اگیرے
اک در بند ہووے سو کھلدا رستے ہور بہتیرے
اوہی اوڑک منزل پوتن، جان گھلاون جیہڑے
دل دا نور انہاں نوں ڈھیندا جیہڑے رین جگیرے
کجھ اجیہے سنگی ڈھیئے ڈاکو چور لٹیرے
رتاں پی ؎پہ آپے ساڈے چولے لہو لبیڑے
نال اپنے لے ڈبے سانوں سنگ اجیہے سیہڑے
کجھ اجیہے لدھے جنہاں بھلے کل بکھیڑے
کجھ اجیہے من جنہاں دے یار مرے دے ڈیرے
تے کجھ وکھ سبھاں توں ڈٹھے حرص ہوس دے گھیرے
پتہ نہیں کچھ کِو ول جانا، مل لئے راہ کیہڑے
پینڈا جام تھیا جیون دا، کیہڑا ریہڑی ریہڑے
جیون کتھا نہ پچھیو میری اس وچہ گھاء گھنیرے
دتی جان رضا پر آسیؔ جھیڑے سب نبیڑے
۱۹۷۲ء
No comments:
Post a Comment