غزل
منافقت نے جلال چہروں پہ لکھ دیا ہے
وفا نے حزن و ملال چہروں پہ لکھ دیا ہے
اسی لئے تو میں کہہ رہا تھا کہ کچھ نہ کہنا
صدا نے اندر کا حال چہروں پہ لکھ دیا ہے
ہوا کچھ ایسا کہ وسعتِ قلب کی کمی نے
منافرت کا ابال چہروں پہ لکھ دیا ہے
یقین و امید و بیم و خوف و گماں نے مل کے
جواب جیسا سوال چہروں پہ لکھ دیا ہے
خلا میں کھوئی، خموش، خستہ خمار نظریں
کسی نے میرا خیال چہروں پہ لکھ دیا ہے
۔ ۱۵؍ مارچ ۱۹۸۸ء
No comments:
Post a Comment