غزل: بے قراریء جاں، جو تو نہ رہی

غزل

بے قراریء جاں، جو تو نہ رہی

میں وہ گل ہوں کہ جس میں بو نہ رہی

ہو گیا بے نیازِ سینہ دل

جامے کو حاجتِ رفو نہ رہی

بجھ گئے شوق کے شرارے بھی

برقِ ناوک بھی تند خو نہ رہی

نا امیدی سی نا امیدی ہے

آرزو کی بھی آرزو نہ رہی

تو نہ ملتا، نہ تھی کچھ ایسی بات

دکھ تو یہ ہے کہ جستجو نہ رہی

وائے بے سمت قافلوں کا سفر

رہگزر کی بھی آبرو نہ رہی

اس کی سرمستیء نظر کے طفیل

حاجتِ ساغر و سبو نہ رہی

دشت میں وہ سکوں ملا آسیؔ

کچھ تمنائے کاخ و کو نہ رہی

۔  ۳۱؍ اکتوبر ۱۹۸۸ء